فايش صعيدى جميل أوى

الحقيقة ياصديقاتى أخدت طريقة الفايش من أمى ربنا يديلها الصحة وعملته وطلع حلو ياريت تجربوه هتحبوه أوى وآدى الطريقة والمقادير
أولاً : المقادير
1- كوب لبن تغليها وتضعيها فى إناء محكم الغلق وتضعيها فى مكان دافئ حوالى يوم وتفتحى عليها إذا لاقيتيها عملت زى الزبادى يبقى هى كده جاهزة للخطوة اللى بعد كدة أما إذا لاقيتيها مبقتش زى الزبادى يبقى تستنى يوم آخر إلى أن تلاقيها بقت زى الزبادى وهى بتبقى كده بسرعة كل ماكانت موضوعة فى مكان دافئ بإستمرار
2- إثنين كيلو دقيق
3- حوالى 1 كيلو لبن ويمكن يحتاج شوية زيادة يعنى تخلى حوالى نصف كيلو إحتياطى جنبك
4- تجيبى من عند العطار ب50 قرش كركم وبجنيه محلب تطحنيه كويس أوى وكمان تنخليه بالمنخل علشان تضمنى إنه ناعم جداً
5-حوالى واحد ونصف كوب سكر
6- قطعة خميرة بيرة فى حجم عين الجمل أو 2 ملعقة كبيرة خميرة جافة وتذوبيها مع ملعقة سكر فى شوية ماء دافئ
7- حوالى كوب سمن بلدى
8- شوية زيت ذرة هنلم بيهم العجين فى الآخر
9- آخر حاجة 2 بيضة

ثانياً : الطريقة
1- تصحى بدرى علشان يبقى نهارك قشدة والفايش يبقى حلو
2- طبعاً هنبدأ العمل بعد الخطوة نمرة 1 المذكورة فى المقادير
3- بنجيب حوالى نصف كوب دقيق ونضع عليه شوية لبن بحيث تكون عجينة مثل عجينة الزلابية ثم نضع عليهم اللبن المتجمد من الخطوة رقم 1 المذكورة فى المقادير سابقاً وأعجنهم كويس جداً إلى أن يختلطوا ويصبحوا عجينة لينة طرية يعنى
4- أغطيهم وأتركهم فى مكان دافئ حوالى ساعة هنلاقيها أختمرت وإرتفعت وبقت جميلة أوى
5- فى أثناء الساعة ديه تكونى إنتى بتحضرى للعجن يعنى دفيتى اللبن ووضعتى فيه الملحب المطحون والكركم شوية شوية بشويش إلى أن يصبح لونه دهبى جميل ومش شرط إن تضعى الكركم كله
6- ثم تسيحى السمن وتضعيه على اللبن
7- تكسرى البيض عليهم
8- ثم السكر على السابق وتذوبيه كويس ويبقى كل الخليط ده دافئ
9- نضع الدقيق المنخول وعليه ذرة ملح ونضع عليه رقم 3 والخميرة البيرة المتحضرة من السابق وأدعكهم كويس فى الدقيق
10- أضع الخليط رقم 8 وأعجن العجينة كويس قوى جداً
11- فى النهاية ألم الدقيق بشوية زيت إلى أن تصبح عجينة ناعمة وحلوة فى إيدك
12- أغطيها وأتركها فى مكان دافئ إلى أن تختمر وتعلى وده من ساعة إلى ساعتين وده حسب دفئ المكان
13- فى إثناء تخمير العجين تكونى بتحضرى الصاجات ودهناهم بالزيت دهناً جيداً
14- بعد التخمير تولعى الفرن على حرارة متوسطة وتتركها
15- تبدأى فى تقطيع العجين إلى فطائر مثل القربانة المتوسطة
16- وتتركيها حوالى ساعة على الصاجات حتى تعلى الفطائر
17- تخبزيها إلى أن تصبح حمراء جميلة
18- بعد أن تبرد تقطعى الفطائر صوابع حسب الرغبة وتعيدى وضعها فى الصاجات وتدخليها الفرن إلى أن يحمر الوجه
19- تعيدى قلب الصوابع على الجهة الأخرى وتدخليها الفرن تانى إلى أن يحمر الوجه الآخر
20- يعنى بإختصار بتحمصى الفايش
وفى النهاية وبعد طول عناء تشطبى المطبخ وتاخدى حمام وتعملى كوب لبن بشاى كبيرة وتاخدى كم صابع فايش معاهم وتدعى لى مش تدعى عليا
وبالهنا والشفا

طب اعمل ايه بقى الفايش برضه على العيد
على العموم كل سنة وانتى طيبة مقدماً

وإنت طيب وتعيش دايماً فى سعادة وهنا إنت والأسرة وإعمل الفايش ده جميل أوى وأنا مجرباه

زوجتى قرات هذا الموضوع ولها مساهمة اخرى فية وهى كالاتى اولا نحضر نصف كيلو لبن طازج ثم نحضر برطمان زجاج نظيف وجاف ونضع به معلقة حمص مطحون يشترى من اى مقله بتاعة اللب والسودانى ونضعها فى البرطمان ونضع معها معلقة سمن بلدى ثانيا نغلى اللبن الطازج وعندفورانه نضعة فى البرطمان على الخليط السابق ونقوم بالتقليب السريع ثم اغلقة غلق محكم واضعة فى مكان دافى كالدولاب او سط ملابس واتركة لمدة 24 ساعة وعند اكتشاف تجمد اللبن داخل البرطمان مثل الزبادى تكون الخميرة قد خمرت .. ثالثا المقادير التى سوف نقولها تصلح لعمل 5 كيلو دقيق .. رابعا المقادير 2كيلو لبن جاموسى طازج + 5 كيلو دقيق + ذرة ملح + 50 قرش كركم + 3كوب سمن بلدى + سكر حسب الرغبة ويضاف محلب حسب الرغبة .. الطريقة نحضر نصف كيلو لبن وحوالى نصف كيلو دقيق ونذوبهم حتى يصبحوا عجينة ونضع عليهم الخميرة السابقة التى تخمرت من قبل حتى يصبحوا عجينة لينه ونتركهم لمدة ساعتين حتى يختمروا .. بعد التخمير نحضر طبق للعجين ونضع فيه باقى اللبن الدافى ونضع الملح والكركم والسكر والمحلب ويتم التقليب الجيد ومعهم الدقيق ويتم عجنهم ونضع عليهم الخميرة المخمرة التى فى الطبق ويتم عجنهم جيدا وفى ذلك الحين تكون السمن سائحة ودافئة ونضعها قليلا قليلا على العجين كله حتى يتشرب كله بالسمن وبعد ذلك يغطى لمدة ساعتين او ثلاثة حتى يختمر وبعد ذلك يقطع قرص بالصحاجات ويتم الخمر ايضا لمدة ساعتين ثم يتم خبزة فى فرن حار وبالهنا والشفا ويترك لمدة يوم لمن يرد تحميصة فيدخل الفرن مرة اخرى مقطعا كصوابع ويتم تحميصة وهذا على مسئولية زوجتى وبالهناء والششفاء ودعواتكم لنا اذا اعجبتكم الطريقة اخبرونى حتى ارسل لكم من زوجتى اكلات وانواع اخرى والرب معنا جميعا وشكرا .. شنودة وزوجتة :{{}}:

ميرسى جداً أخونا العزيز وهبة إنت والسيدة العزيزة الفاضلة زوجتك على ردكم الرقيق جداً لكن الحقيقة لما قريت الرد بتاع حضراتكم لقيته إن ديه نفس المقادير كانت أمى تعملها وكمان حسيت بأن حضرتك صعيدى صرف لأن ديه طريقة صعيدية مية فى المية جولى بقة إنت من وين بالضبط علشان أجولك أنا من وين بالضبط
وبالمناسبة ديه عارف الصعايدة مبيشربوش مية كتير ليه ياريت الإجابة مع التعليق القادم
وكل سنة وحضرتك والأسرة بخير المسيح قام

خيتى العزيزة ايمى انى من الصعيد من المطيعة وزجتى من النخيلة محافظة سيوط ولكن للعلم انا مواليد الجيزة وزجتى ايضا وهذة الاكلات تعتبر موروثة من الاهل بنظام التسليم اى ان الام تعلم اطفالها منذ الصبا على عمل كل شئى داخل المطبخ فزوجتى تعرف الكثير من الاكلات الصعيدية النادرة التى ربما لايعرفها احد وهذة ثروة بالنسبة لى واذا اردت اواراد اى احد من المنتدى معرفة اى طريقة لاى نوعية من الماكولات الغريبة او الجديدة عليكم يمكنكم السؤال ونحن نرسل لكم الطريقة ... وان كان عندك ياخيتى اى اكلة او حلويات او مخللات بطريقة جديدة يمكنك تعر يفنا عليها وبالمناسبة ان بلديتنا ميشربوش مية علششان القفل اللى فى مخهم مايصديش وكمان علشان هما معمولين من الطين ويخافوا يدوبو ؟؟ صح والا لاء

والله ياخوى ياوهيب إحنا طلعنا جرايب أنا من أسيوط - الشامية - مركز ساحل سليم وزوجى أيضاً حيث إننا أولاد عم ولكن الحقيقة إحنا من مواليد القاهرة وأنا عن نفسى عمرى ماروحت الصعيد بس أى صعيدى أعرفه عن بعد زى ماتقول الدم بيحن وعلى فكرة أنا مبسوطة أوى بمعرفة حضراتكم إنت والمدام وياريت عندنا فى المنتدى بتاعنا قسم للمطبخ ياريت أختنا العزيزة زوجة حضرتك تكتب كل يوم ولو أكلة من الحاجات الجميلة إللى تعرفها واللى صدقنى بدأت تنقرض من تمدين الناس وبعدهم عن الأصالة وأنا أول واحدة هنفذ الحاجات اللى فعلاً نفسى أتعلمها وطبعاً الأكلات ديه هتتكتب بإسمها وتفضل على المنتدى حيث يتوارثها الأجيال القادمة التى لاتعرف أى شئ عن المطبخ الصعيدى الأصيل وهيكون لها أجر وثواب كبير حيث إنها ستساهم فى إحياء التراث الصعيدى الأصيل
أما بالنسبة للفزورة فهى صح أكيد وموتتنى من الضحك وكمان إنت أضفت عليها حتة الطييييييييييييييييييييييييييين
ميرسى على خفة دمك وأهلاً بجرايبنا