كيكة روعة وغير مكلفة

المقادير
1 كوب من الزبدة بدرجة حرارة الثلاجة (مهم جداً تكون ساقعة)
2 كوبيتين سكر ناعم جداً
3-ثلاث بيضات ومعاهم باكو فانيليا
4- كوب وثلث لبن
5- أربعة أكواب من الدقيق وواحد باكو بيكنج بودر يخلط بالدقيق
6- شوية زبيب حسب الرغبة
طريقة العمل
1- يوضع الزبد الساقع مع السكر الناعم فى العجان أو يضربوا جيداً بمضرب البيض حتى يصير الزبد والسكر لونه ابيض وهش
2- يوضع البيض عليه بيضة بيضة حتى يمتص جيداً فى الزبد والسكر ومعاهم الفانيليا
3- ثم يوقف الضرب بالمضرب وبمعلقة خشب يتم خلط الدقيق المخلوط بالبيكنج بودر تدريجياً هو واللبن يعنى شوية دقيقة ثم شوية لبن ونخلط حتى يتم إمتزاج الخليط خيداً وننتهى من الدقيق واللبن
4- بنكون محضرين صينية كبيرة وندهنها بالسمن المرشوش بالقيقة ونصب الخليط فيها وهو بيكون خليط سميك جداً
5- بعد مافردنا العجين فى الصينية نوزع الزبيب على الوش وبالمعلقة نحاول نخفيه فى العجين حتى لايظهر بس الكلام ده برفق ولانقلب العجين
6- ندخلها فرن هادئ الحرارة لمده حوالى 50 دقيقة أو حسب فرنك ولاتفتحى عليها قبل مرور نصف ساعة على الأقل
وبالهنا والشفا وهى الحقيقة كيكة جميلة جداً جربوها وأدعوا لى

سلام ونعمة رب المجد
اولا وحشتينى بجد
ثانيا ممكن اضيف كاكاو
عليها لانى بحب الشيكولاته جدا
وميرسى على تعبك

أولاً ميرسى جداً على مجاملتك الرقيقة وإنت وحشتينى ووحشنى المنتدى كله
أما بالنسبة للكيكة ممكن جداً بس مقدار الكاكاو اللى حتضيفيه تستبدليه بكمية مماثلة من الدقيق يعنى لو هتضيفى 1كوب كاكاو تشيلى مكانها كوباية دقيقة وبالهنا والشفا بس عايزة أقولك أنك تهتمى جداً بضرب الزبدة مع السكر الناعم جداً كويس ثم البيض تضيفيه واحدة واحدة حتى يختفى تماماً فى الزبدة مع السكر وتطلع بإن الله كيكة جميلة تشبه البسكويت الناعم جداً والحقيقة جميلة

سلام ونعمه رب المجد
ميرسى يا ايمى
وانا فعلا هجربها لان ابنى زى بيحب الكيكه والشيكولاته
ربنا يعوض تعب محبتك

ميرسي جدا علي هذه الوصفة اللي اكيد رائعة بس انا عايزة اعرف مقدار الباكو( بيكنج بودر) بمعلقة الشاي

وربنا يعوضك كل خير

أولاً أهلاً بيكى يا إيمان فى منتدانا وميرسى على مرورك الرقيق وبالنسبة للبيكنج بودر الحقيقة معرفش أد ايه من الملعقة بس ممكن تشترى باكو وتعرفى بمعلقتك قد ايه لأن الملاعق تختلف من بيت لبيت بس ياريت تجربى الكيكة ديه لأنها بجد بتدى نتائج روعة وطعمها جميل أوى وياريت تعملى وتدوقينا بس طبعاً بعد ما الصيام يخلص وكل سنة وإنت طيبة