حل لمشكلة السرحان فى الصلاة

احسن حل لمشكلة السرحان اثناء الصلاة عن تجربة شخصية انى ابتديت افتح الاجبية واقرأ وانا بصلى حتى لو كنت حافظة الصلاة وكمان اقراها بصوت مسموع دة بيخلى اكتر من حاسة تشتغل فى وقت واحد البصر والسمع ودة هايزود تركيز العقل فى الكلام المسموع والنظر . ممكن كمان انى اشاور بإيدى على الكلام وانا بقراه دة ليه فايدة فى زيادة التركيز. اما عن مشكلة السرحان اثناء القداس ودى كتير بتحصل لناس كتير اولا اثناء ذهابى للكنيسة كل تركيزى انى هاجى اقابل ربنا وما اخليش اى فكرة تجيلى تانى وانا فى طريقى. تانى حاجة انا اتعلمت الحان وخصوصا الالحان اللى بتتقال فى القداس اخدت منى كام اسبوع بس ليها فايدة كبيرة انى وقت القداس عرفت اتابعه من الخولاجى واقراه واقول مع الشمامسة لكن قبل الفترة دى ما كنتش اعرف اى حاجة عن الخولاجى وازاى اطلع منه اللى بيتقال الجهل وحش اوى فى الدين وكل ما نتعلم اكتر كل ما هانستفاد اكتر صدقونى دى كانت تجربتى الشخصية اللى بنعمة ربنا اتغلبت علي السرحان بيها وربنا يبارك حياتكم ويبعد عنكم عدو الخير اللى بيحاول يبعدنا عن ربنا

ربنا يباركك أختى سمر وديه بالفعل نصايح مفيدة جداً لمشكلة السرحان أثناء الصلاه وديه فعلاً متجربة ومفيده جداً فى نتيجتها
شكراً جداً على تعبك ومجهوداتك أختنا سمر
صلى من أجلنا

مرسي جدا على المعلومه لانها فعلا بتحصل معايا وانا ها جربها لان ده مشكله عندى