مربى اللارنج للشطار بس

واكمالا لموضوع اللارنج فلمن يحب المربى
مربى اللارنج
المقادير
1-عشر حبات لارنج
2-كيلو سكر
الطريقه
أولا نعقد السكر فى 2 كوب ماء اى نغلية تلت ساعة لحد ما يبقى شبه الشربات

ثانيا:تقشر الحبة بسكينة حامية لازالة القشرة البرتقالية الخارجية ويمكن استخدام المقشرة اسهل
ثم بعد ذلك نعمل حز بالسكينة فى منتصف الحبة
ثم نثبت يدنا على احد النصفين ونلف النصف الاخر فى اتجاه واحد
كما نفتح علبة الكريم فنحصل على نصف خالى من الثمرة ونصف متعلق به الثمرة
ننزع القلب ونجمع كل القلوب ونعصر باليد فى مصفاه ضيقه
اوعى تعصريها فى الخلاط يتكسر البذر ويعمل مرارة
يوضع العصير الناتج فى الثلاجة لحين الانتهاء من التجهيز وممكن ان نصفية بمصفة الشاى لو حبينا
نرجع تانى للحم الابيض وهو الجزء بقلب اللارنج نبدأ بكحت كل فص بملعقة
اما الجزء الاصفر ناخذه ونقطعه حسب الرغبه ممكن شرائح طوليه
نغمرها بالماء ونغليها مرة واحدة ونصفيها ثم نغمرها بماء جديد
ونغليها لمدة ساعة حتى تنضج تماما ولو احتاجت مية نزود لحد ما تستوى وتصبح شفافه
نصفيها كويس ونضعها فى السكر المعقود ونتركها تغلى على نار هادئة لمدة ساعة
ونقلبها باستمرار ومنشلش الريم لانه سكر وجزء من المربى وحيدوب جوة المربى كل ما تقلبى
ملحوظة مدة السوا دى ل2 كيلو يعنى اللى تعمل كيلو تراعى الفرق
وتراقب باستمرار وتحط شوية فى طبق وتسيبهم يبردوا لو قوامها كويس تتطفى خلاص
بعد كده نجيب العصير من الثلاجة ونضيفة للمربى ونغليها عشر دقائق ونطفى النار
ثم نقلب لمدة دقيقتين لحد الريم ما يختفى ونختبرها لما تبرد لو لسة نديها غلوة 5 دقائق بس مش اكثر لانها لما تبرد بيتقل قوامها
لا نضع ليمون العصير كافى
ياريت تجربوها حتعجبكم دى مرة واحدة فى السنة والحقوا اللارنج قبل ما يختفى
متخفوش المرارة ممزوجة بالسكر بتدى طعم رائع احلى من الجاهزة بكتير
ودلوقت اقولكم على المربى اللى مش مرة هى هى الطريقة لكن بعد ما اسلق القشر
انقعة فى ماء لمدة يوم مع تغيير الماء باستمرار لكن طعمها مش لارنج مفيهاش نكهة اللارنج خالص بتكون زى مربى البرتقال

ميرسى جداً ياميرا على المربى ديه لأنى كان نفسى أعملها بس ماكنتش عارفة الطريقة بس مفهمتش الجزء بتاع السكينة والنصفين ياريت توضحيها شوية ينوبك ثواب والأجر عند الله مستنية التوضيح متتأخريش عليا علشان اللارنج ميخلصش وبعدين هقولك أبعتيلى برطمان من عندك

كنت اتمنى ابعت لك ولكل اعضاء المنتدى وبالنسبه لموضوع السكينه هتقطعى اللارنج زى الليمون بس بون ان تصلى للقلب بس القشره وبعدين تفصلى القشره وتجمعى القلب وتعصريه وتاخدى العصير بدون بذر ولو تحبى ابعت اللارنج وبسرعه قبل ما يخلص عموما انا عملتها بالطريقه المره وحلوة جدا
ولو تحبى تكلمينى على الاميل
وبالهنا والشفا اتمنى تعجبك

كدة فهمت ميرسى ياميرا على إهتمامك وردك بسرعة وده طبعاً مش علشان إنت خوفتى لتبعتى برطمان مربى لكل عضو من أعضاء المنتدى لكن لأنك حابة إن نعمل المربى ونستمتع بيها أما بالنسبة للإيميل فده طبعاً يشرفنى وياريت