أشرف يطلب صلواتكم

محتاج لصلواتكم

في البداية أتمنى طول الأناة .
لما كنت صغير كنت بروح الكنيسة علشان ماما وبابا بيروحوا الكنيسة كل يوم جمعة ، وكنت بحضر القداس لكنى ماكنتش بفهم أى حاجة ، استمر الوضع ده لحد سن 9 سنين ،بعد كده ابتديت أحس بملل من حضور القداس ومابقتش أحضر الكنيسة خالص ،

طبعا غرقت فى الخطية وبحكم الإحتكاك بالناس التانية إتعلمت إنى أزنى ، أشتم ، أسرق ، أعمل كل شر ، وأستمريت فى الخطية لحد سن 14 سنة وبالرغم من إنى كنت أوقات بحس بحاجة كده جوايا تقولى إن ربنا بيزعل منى لما بعمل كده إلا إنى ماكنتش بهتم بإنى أغير من سلوكى ،

فى أولى ثانوى عام أتعرفت على الكنيسة الإنجيلية وإبتديت أروح هناك ، وفى يوم كان فيه نهضة وفى النهضة دى سمعت ترنيمة كيف أنسى ، رجعت فى اليوم ده وأنا حاسس بندم كبير على كل حاجة عملتها زمان ، طلبت الغفران وفعلا حسيت إن خطاياي غفرت كلها وحسيت بسعادة جامدة قوى بكده ، وإبتديت أهتم إنى أتغير، وإبتديت أقرا فى الكتاب المقدس وأصلى وأروح الكنيسة ( الإنجيلية ) أحضر كل الإجتماعات وبقيت إنسان تانى خالص مليان من المحبة لله وللناس ، وبالرغم من إنى كنت أوقات كتيير بعمل الخطية إلا إنى عمرى ماحسيت إن الخطية فصلتنى عن محبة الله

وكنت بعدها بحس بندم شديد على إنى عملت الخطية وألوم نفسى وأقول ليه أنا عملت كده إلا إنى ماعرفتش أتغير أبدا لأنى كنت برضه بعمل الخطية بالرغم من إنى أوقات كنت بحس بصوت يقولى ماتعملش كده ربنا هايزعل منك إلا إنى كنت بستمر برضه فى عمل الخطية ، وكنت بحاول بقى إنى أكون واحد من الإنجليين وفعلا فى أقرب فرصة أخدت العضوية الإنجيلية ، أعلنت قدام كل الكنيسة إنى عايز أكون إنجيلى وتكون الكنيسة الإنجيلية هى كنيستى ، وإبتديت إنى أهتم بالأمور الطائفية وأجادل فيها ( بغباء وتحزب جامد ) وأنكرت دور القديسين وشكيت فى بتولية كلية الطهر ( القديسة مريم ) ( وأنا النجس الدنس ) يعنى إتحولت لإنجيلى 100% ( من حيث إيمانى بالعقيدة الإنجيلية )،

ومع الوقت ( ماكملتش 6 شهور ) وإبتدت حياتى فى الضعف الشديد ورجعت عن الصلاة ورجعت عن انى اروح الكنيسة وحضورى للإجتماعات قل جداااااا لحد مابعدت خالص عن الكنيسة ، وإستهونت بطهارة جسدى وفى يوم عملت الخطية وكان نفسى جداااا إنى ماأعملهاش لكنى وقعت فيها فقلت ( فين هو الروح القدس مش بيغيرنى ليه ؟! وشتمت على الروح القدس ) ،

وبعدها قولت ( أنا مش عارف أعيش معاك ، أنا مش عارف أعيش الطهارة والقداسة ، سيبنى بقى مش عايز أسمع الصوت اللى بيأنبنى ده تانى ) وعملت الخطية مرة تانية فى نفس اللحظة رغم إنى ماكانش لي أى شهوة لعمل الخطية مرة تانى ، لكنى حملت نفسى على الخطية وعملتها ، بعدها حسيت فعلا بأن الصوت اللى كان جوايا سكت ومن وقتها وأنا مش قادر أسمع صوته تانى لحد اللحظة دى ، وماروحتش أى كنيسة بعد كده ولا حاولت إنى حتى أدخل أى كنيسة ،
حسيت إنى ضعيف جدااااا ومافيش منى أى فايدة ، إبتديت أكتئب وشوية بشوية بعدت عنها ، ولما بعدت عنها حسيت بإحتياج لله ، إبتديت أقرب من الكنيسة الأرثوذكسية رغم قلة إيمانى لكنى كنت برضه بحاول ، روحت الكنيسة أكتر من مرة وإعترفت وأتناولت ، إشتركت فى الموجه القبطية ، ولما شوفت المستوى الروحى لبعض ناس هنا حسيت إنى ضعيف جداااااا ( ومازلت حاسس ) ، برضه لسة جوايا إحساس بالضعف وعدم الثقة فى حب الله وتغييره لي ، رغم إنى عارف إنه يقدر يغيرنى إلا إنى مش حاسس بثقة فى إنه هايغيرنى ، مش حاسس إنى إبنه زى ماكل اللى بيطلبوا إنهم يتغيروا بيحسوا إنهم أولاده ( حاسس إنى غريب ) ،

اولا لانك حاسس بالاحاسيس دى وبالندم فهنا روح الله فينا لا تنطفئ
بس حتى تنمو فى روحانياتك هناك منهج ينبغى ان يساعدك
اولا واظب على القراءة والتأمل فى الكتاب المقدس وقبل القراءة ينبغى عليك يا صديقى ان تعطى لنفسك فرصة لسماع الترانيم والتسبحة وهى متاحة لك الان عن طريق الحضور فى الخدمات الكنسية المختلفة
او حتى عن طريق الفضائيات الجميلة مثل اغابى او سى تى فى
واعطى لنفسك فرصة للندم بدون تزكر تفاصيل خطاياك ولكن اندم فيها بقلبك
وياريت يكون لك مرشد روحى يرشدك وتغصب نفسك فى تنفيذ وصاياه
حاول تشترك مع جماعة المؤمنين فى اعمال الرحمة من زيارات للمرضى والاشتراك معهم فى هذه الاعمال بكل جدية وأقرا لسير القديسن واقرأ كتب ونبذات قديسنا المعاصر البابا شنودة فهناك كثير من البنذات التى يمكنك حملها فى اى مكان تساعدك فى النمو الروحى والسهر الروحى وكيفية السير فى حياة التوبة والنقاء واستمر فى الاعتراف والتناول وانشالله ربنا هايغيرك وصلى من اجلى