منتدى الملاك

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
منتدى الملاك

لك القوة والمجد والبركة والعزة إلى الأبد.أمين +++عمانوئيل إلهنا وملكنا

عزيزى الزائر اذا اعجبك موضوع بالمنتدى يمكنك
أن تضغط على زر أعجبنى اعلى الموضوع
عزيزى الزائر ان اعجبك موضوع يمكنك ان تكون اول من يشاركه لاصدقائه على مواقع التواصل مثل الفيس بوك والتويتر بالضغط على زر شاطر اعلى الموضوع

4 مشترك

    الحل لخطية العادة السرية

    emy
    emy
    ملاك مشرف
    ملاك مشرف


    رقم العضوية : 4
    البلد - المدينة : egypt
    عدد الرسائل : 2189
    شفيعك : الملاك ميخائيل
    تاريخ التسجيل : 03/07/2007

    cc الحل لخطية العادة السرية

    مُساهمة من طرف emy الأربعاء 7 نوفمبر 2007 - 11:01

    الحل لخطية العادة السرية
    هى بالفعل مشكلة متعبة لشباب كتير . وكتير حاولوا يتخلصوا منها لكن فشلوا
    وكل واحد فشل يبقى اكيد معملش اللى هنقولوا دلوقتى . عشان كدا بنعمة ربنا اتمنى انك تعطى اهتمام لكل نقطة هنكتبها وتحاول بكل جهدك انك تنفذها كلها لو فعلا عايز تحيا فى طهارة وعفة وتتخلص من عبودية العادة السرية .
    احنا طبعا محتاجين نعمل حاجتين اساسيتين للحل :
    1. حلول سلبية ( البعد عن مجال الخطية )
    2. حلول إيجابية ( الوقاية الأيجابية )
    الحلول السلبية بتتلخص فى انك تبعد عن هذه العادة تماما وما يثيرك نحوها
    أما الحلول الأيجابية هى الحياه فى جو روحى كامل يعطيك مناعة اذا إشتدت عليك الحرب عشان تكون عندك المقدرة للمقاومة ولذلك حلنا الأول والأخير هو ربنا فقط
    معظم اللى فشلوا انهم يتخلصوا منها كان جهادهم عبارة عن انهم يبعدوا عنها فترة وعن اى اثارة ولكن من غير ما يقربوا لربنا . يعنى كانوا عايزين يرجعوا لربنا من غير ما يكونوا مع ربنا .... !!! بمعنى برده . انهم كانوا بعيدين عن الجو الروحى وقريبين من جو العالم وبالتالى مكنش عندهم اى مناعة للمقاومة يعنى لما يجى الشيطان يحاربهم كانوا يسقطوا مع اول حرب
    دى كده اول حاجة ممكن تستفيد منها ... انك عشان ترجع لربنا وتتوب لازم تكون مع ربنا بس ومتسبش اى حتة من قلبك للعالم
    لو استوعبت بقى النقطة دى كويس يبقى عندنا كده خطين هنمشى فيهم مع بعض
    فى علاجنا السلبى اكيد فيه فى حياتك دلوقتى حاجات كتير مرتبطة بالخطية وعشان كدا لازم نبدا كل شئ من جديد يعنى مينفعش نرقع الثوب القديم برقع جديدة . إما اننا نعمل ثوب جديد من الأول او يبقى مالوش لازمة تعبك :

    1. إيميلك مثلا ربما بيجيلك عليه إيميلات جنسية . لازم تلغيه خالص وتعمل واحد جديد مهما كان الأيميل مهم عندك وعليه حاجات مهمة مش هتكون اهم من أبديتك .
    2. خط تليفونك ربما يكون عليه بعض الأشخاص اللى بيكلموك عليه وبيجروك للخطية . لازم ترميه واشترى خط جديد محدش يعرفه منهم . وبردوا مهما كان الأشخاص اللى متسجلين عليه مهمين أكيد مش اهم من السما .
    3. جهاز موبايلك نفسه لو عليه اى حاجة جنسية . فرمت الكارت كله وشيل منه الخطية
    4. أحفظ حواسك تماما وخصوصا لو كنت فى الشارع . احفظ نظرك ومتبصش على اى بنت ماشية فى الشارع . امشى فى الشارع وكأن محدش فى الشارع غيرك انت وبس
    5. الأنترنت نفسه لو كان بيعثرك بمواقع جنسية ابعد نفسك عنها تماما ومتفتحش اى موقع منها وقلل جلوسك قدام الكمبيوتر والأنترنت طالما مش بيفيد عملك او دراستك لآن زيادة استخدامك للأنترنت بدون هدف ولمجرد التسلية هيكون سبب لسقوطك
    6. هارد الكمبيوتر بتاعك لو عليه اى افلام او صور جنسية امسحها فورا ومتخليش أى اثر للخطية قدامك . اتخلص من اى شئ ممكن يعثرك .
    7. ابعد كمان عن السهر بليل قدام الكمبيوتر والأنترنت عشان الليل بالنسبالك معثر فى الوقت ده يعنى ضرورى تنام بدرى وتصحى بدرى عشان طول ما انت فى النور والشمس افكار الشهوة بتكون قليلة عليك
    8. لو كنت بتفتح القمر الصناعى وتتفرج على اى قناه جنسية . امسحها خالص من على القمر عشان لو ضعفت متلاقيش حاجة تساعدك على الخطية بسهولة قدامك
    9. أصحابك نفسهم اللى معاك فى الجامعة او المدرسة او العمل لو كانوا بيعثروك بأحاديثهم النجسة او نكتهم السخيفة اقطعهم نهائى من حياتك مهما كانت اهميتهم فى حياتك . لأن أصحابك دول هما اللى ربنا قال عنهم الايه دى " فان كانت عينك اليمنى تعثرك فاقلعها و ألقها عنك لانه خير لك ان يهلك احد اعضائك و لا يلقى جسدك كله في جهنم ( مت 5 : 29 ) "
    10. الأفكار النجسة لو حاربتك إياك ان تجارى هذا الفكر الدنس عشان لو تحاورت معاه هتضعف قدامه وبالتاكيد هيجرك فى النهاية للخطية
    11. الوقت اللى قاعد فيه لوحدك ومش بتعمل فيه حاجة معينة إما ان تشغله بشئ روحى او تشوف حد تقعد معاه . لأنك لو كنت لوحدك ومش بتعمل حاجة يبقى الشيطان هيتسلى عليك والعقل الفاضى معمل للشيطان
    12. عدم الأفراط فى اكل اللحوم والدهون والبعد عن الأطعمة الحريفة والتوابل ( الشطة ) .
    13. لا تعطى لجسدك راحة فوق اللازم ولا تكثر فى النوم بطريقة زائدة . ولا تذهب لسريرك للنوم وانت تشعر انك غير محتاج للنوم .
    14. من أهم النقط فى كل اللى قلناه ده هى النقطة دى .... أنك مهم جدا تبعد خالص عن جو العالم . " لآن العالم كله وضع فى الشرير والجميع زاغوا وفسدوا وليس من يعمل الصلاح ولا واحد " وانا قصدى بجو العالم ( الأفلام والمسرحيات والأغانى والكليبات والبرامج الهيفة اللى تضيعلك وقتك على الفاضى والمجلات الفنية وووووو...... ) الحاجات دى كلها مفهاش أى استفادة ليك بل بالعكس كلها عثرات وبتفضل تترسب فى عقلك الباطن من غير ما تشعر واول لما تشتد عليك الحرب تقوم تطلع عليك وتضعفك لحد ما تسقطك . لأن معروف ان الأمر الذى لا يفيد روحيا فهو يهدم .
    دى بعض النقاط السلبية فى حياتك واللى هدفنا منها انك تبعد تماما عن أى اثارة تجرك فى النهاية للعادة السرية . يعنى بأختصار لو قدرت تعالج نفسك سلبيا من خلال هذه النقاط هتقدر تكمل فى المعالجة الأيجابية اللى هنتكلم عليها دلوقتى ودى الأهم .

    اما المعالجة الأيجابية فهى معروفة وهى الحياه فى جو روحى كامل بعيد تماما عن هذا العالم الشرير :
    أهم حاجة تبدا بيها انك تدخل الاوضة بتاعتك وتقفل باباها وتقف قدام ربنا تكلمه بكل صراحة عن ضعفاتك وتقوله انا نفسى أرجعلك يارب وأبقى كويس وارضيك وافرح قلبك . انا يارب مش بخونك لما بعمل الخطية لكن انا ضعيف وبعملها غصب عنى . بعملها عشان هى مسيطرة عليا مش عشان انا بحبها .... (( صلى لربنا بكل حاجة انت حاسسها ......))
    وبعد لما تصلى جاهد لتنفيذ هذه النقاط :
    1. لازم اب اعترافك يحددلك قانون صلاة يومى " صلوا لكي لا تدخلوا في تجربة ( لو 22 : 40 ) "
    2. الأنتظام على الأعتراف على الأقل مرة شهريا " ان اعترفنا بخطايانا فهو امين و عادل حتى يغفر لنا خطايانا و يطهرنا من كل اثم ( 1يو 1 : 9 ) "
    3. التناول مرة فى الأسبوع على الأقل . من ياكل جسدي و يشرب دمي فله حياة ابدية و انا اقيمه في اليوم الاخير ( يو 6 : 54 ) "

    4. قراءة الكتاب المقدس بصفة يومية وبأنتظام وياريت كمان لو استعنت بتفاسير فى اى جزء تقراه عشان القرأه بتفاسير بتكون أعمق واقوى " هلك شعبي من عدم المعرفة ( هو 4 : 6 ) "
    5. القراءات الروحية مهمة جدا وخصوصا فى سير القديسين والشهداء وخصوصا القديسات والشهيدات عشان تقدر تعرف وتدرك ان فى نساء كتير عاشوا الطهارة وعشان تساعد افكارك اللى تلوثت بالمناظر الجنسية ان المرأه مش مخلوقة للجنس لكنها قدرت تبقى قديسة وشهيدة . " لهذا تضلون اذ لا تعرفون الكتب و لا قوة الله ( مر 12 : 24 ) "
    6. القراءة عن الأبدية والدينونة فأن الذى لا تربطه المحبة بالله قد يربطه به الخوف . رأس(بداءة) الحكمة مخافه الرب (مز 111: 10 ) " أقرأ عن الملكوت والموت والدينونة وعقوبة الأشرار أقرأ عن النفس ومصيرها وحالتها فى مكان انتظارها . واحضر الجنازات وسير فى مواكب الموتى وعزى أسر المنتقلين .. والأثر العميق الذى يتركه فى نفسك كل ده لا تضيعه سريعا وانما استغله لتجلس إلى نفسك وتفكر فى مصيرك وتعمل أعمال تليق بالتوبة .
    7. الألتزام بكل صيامات الكنيسة طوال السنة . وخد بالك ان الصيام لازم يكون فيه فترة انقطاع عشان الصوم من غير أنقطاع ميبقاش صوم . " ليس بالخبز وحده يحيا الانسان بل بكل ما يخرج من فم الرب يحيا الانسان ( تث 8 : 3 ) "
    8. واظب على حضور اجتماعات فى الكنيسة سواء اجتماع شباب او اجتماع عام لآنك هتسمع فيها كلام ربنا وهتشترك فى مسابقات تشغل وقت كتير عندك وهتتعرف على اصدقاء من الكنيسة ناس كويسين يساعدوك انك تلاقى أصدقاء حقيقين ويقربوك لربنا اكتر. " لانه حيثما اجتمع اثنان او ثلاثة باسمي فهناك اكون في وسطهم ( مت 18 : 20 ) "
    9. حاول تشترك فى اى خدمة بسيطة فى الكنيسة على الأقل فى البداية لو مش متعود على الخدمة . شوف خدمة مثلا مواعيدها مرة فى الأسبوع . بس لازم تخدم عشان تخرج من القوقعة اللى انت عايشة فيها دى . " وحيث اكون انا هناك ايضا يكون خادمي ( يو 12 : 26 ) "
    10. أهتم انك دايما تشغل ترانيم فى البيت والحان ومزامير عشان دى بتطرد الشياطين من البيت بدل ما تشغل الأغانى اللى ممكن تزرع فيك افكار تضرك وتدخلك الشياطين . ثق انك طول ما انت بتعيش نفسك فى اى حاجة تبع العالم يبقى الشيطان موجود معاك وشغال .
    11. التأمل أمام ايقونة لصليب رب المجد يسوع المسيح . ضع صورة كبيرة فى حجرتك للسيد المسيح وهو على الصليب وتأمل فيها وكيف تحمل الأهانة والتعيير والصلب لكى يعطيك حياه نقية جديدة وانت بجهلك لوثتها " مجروح لاجل معاصينا مسحوق لاجل اثامنا ( اش 53 : 5 ) "
    12. اخر حاجة هقولهالك ودى اهم حاجة بقى اللى بيها هتقدر تحافظ على كل جهادك الروحى فى النقط السابقة . انك لما تقرر التوبة والرجوع أكيد الشيطان مش هيسيبك خالص وهيفضل يحاربك ويفكرك بالخطية ولذتها عشان ترجع تانى ويوقعك .. فعشان بقى تقاوم الحرب دى من اولها وتتغلب عليها فى البداية لآنك لو سبت نفسك للفكر يستمر معاك نهايتك هتكون السقوط .. ولذلك هقولك نصائح الشيخ الروحانى القديس يوحنا سابا عن كيفية محاربة شيطان افكار النجاسة والشهوة من بدايتها عشان تقدر تنتصر :
    اول لما تحس ان الشيطان بدأ يفكرك باى خطية ترسم نفسك بعلامة الصليب كتير وانت بتردد بأسم الصليب باسم الصليب باسم الصليب كتير وكذا مرة تقولها
    وترسم علامة الصليب كمان على الأربع اركان الحجرة اللى انت قاعد فيها ولازم تثق انك وانت بتعمل كده الشياطين اللى حواليك بتتحرق بالنار من علامة الصليب الى بترسمها وكتير من اباء البرية كان ربنا بيفتح عيونهم ويخليهم يشوفوا الشياطين وهى بتتحرق بالنار لما بيرسموا علامة الصليب عليهم
    واثناء محاربتك للشياطين دول وانت بترسم علامة الصليب على نفسك وعلى الحجرة بأستمرار فى ثلاثة اشخاص لازم تنادى عليهم عشان يلحقوك وتتشفع بيهم

    التلاتة دول : الملاك ميخائيل والشهيدة مارينا والشهيدة يوستينا

    التلاتة العمالقة دول بالذات كل الشياطين بتترعب بس من مجرد ذكر اساميهم عشان كان ليهم مواجهات مباشرة مع الشياطين وسحقوهم فيها وخصوصا قوى الملاك ميخائيل مرعب الشياطين. وتأكد ان اول لما تنادى عليهم هيجوا فى لحظتها ويربطوا كل الشياطين اللى بتحاربك ويولعوا فيهم بالنار ويساندوك .
    كمان تردد اسم ربنا يسوع كتير (( ياربى يسوع ارحمنى انا الخاطي – ياربى يسوع اعنى انا الخاطي – ياربى يسوع انقذنى انا الخاطي ........... ))
    ومهم انك تسكب نفسك لربنا فى الصلاة وتطلب منه بلجاجة انه يرحمك ويرفع عنك عشان انت ضعيف محتاج معونتة وقوتة تسندك

    عايز انبهك لحاجة مهمة كمان ..... انك كنت أبن للشيطان ودلوقتى انت عايز تكون ابن لربنا
    ومش ممكن الشيطان هيسيب تعبه الفترة اللى فاتت دى كلها يضيع كده بسهولة لما تتوب وتبعد عن طريقه الدنس
    عشان كده الحرب الفترة الأولى دى هتكون عنيفة عليك . وانا مش بخوفك بالعكس انا بقولك عشان تحضر نفسك كويس للحرب واقرأ الرسالة ديه كذا مرة وركز فى نقاطها وخصوصا نصايح القديس يوحنا سابا عشان لو التزمت بيها هتحافظ على حاجات كتير قوى
    انا عارف ان كلامى صعب ومش سهل يتنفذ وعارف انك بتعمل الخطية غصب عنك عشان نفسك تعمل الصح ومش قادر .. لكن ثق اننا بانفسنا ضعاف جدا لكن طالما بندخل ربنا معانا فى كل حرب وبنادى عليه ونستغيث به أكيد مش هيسبنا نسقط لأننا ولاده .
    لكن لو حصل وانت فى طريق جهادك وسقطت إياك نهائى من اليأس
    لا تيأس ابدا فى جهادك مهما بدت الحرب صعبة عليك
    وعلى فكرة الكلام اللى بقولهولك دة مكتوب فى قصة فى كتاب(بستان الرهبان) كانت قصة راهب متوحد فى مغارة وكل يومين تلاتة يجيلة الشيطان فى هيئة امرأة جميلة ويغريه ويوقعة فى الزنا وبعد ما الشيطان يسيبة ويمشى ... الراهب يركع ويصلى لربنا ويبكى بالدموع وكان فعلا بيقدم توبة حقيقية عشان ربنا يساعده وكان الراهب ده يقول للشيطان لما يسيبه (( انت بتضرب بسلاح الزنا والنجاسة وانا بضرب بسلاح الرجاء فى رحمة ربنا لحد لما نشوف مين اللى هيكسب فى الأخر .. نجاستك ولا رحمة ربنا )) لكن بعد يومين يجيلة تانى الشيطان و يوقعة فى الزنا بسبب ضعفة ولما الشيطان يمشى ... الراهب يقف يصلى ويبكى بعد الشيطان مايخرج.. فضل على الحال دة 17 سنة .. تخيل !!! وبعد 17 سنة ظهر الشيطان للراهب دة على هيئتة الحقيقية السودا البشعة وقالة (( انت اية يا أخى ... مش عايز تيأس من خلاص نفسك. انا خلاص قررت اسيبك لانى لو استمريت معاك اكتر من كدة هديلك اكليل الرجاء بدل ما كنت جاى اخد منك اكليل ابديتك )) ومن بعدها ربنا رفع عنه الحرب دى وعاش فى قمة الطهارة والعفة إلى ان تنيح بسلام .

    + معلومة مهمة وأخيرة لازم تكون واثق فيها أثناء حربك وجهادك ان فى ملايكة وقديسين كثيرين يتشفعون ويصلون لك دون ان تطلب منهم لآن كل ما يشغل السمائيين هو ان الأرضيين يخلصوا " فقال لا تخف لان الذين معنا اكثر من الذين معهم ( 2مل 6 : 16 ) "
    + جهز نفسك من دلوقتى وقدس أفكارك وأعضائك حتى تستحق ان تلبس الثياب البيض وتضرب بقيثارة الروح وترنم الترنيمة الجديدة أمام عرش النعمة مع كل القديسين اللى سبقونا للسما تلك الترنيمة التى قال عنها يوحنا الحبيب أنه لم يستطع احد ان يتعلمها إلا " الذين لم يتنجسوا مع النساء لانهم اطهار ، هؤلاء هم الذين يتبعون الخروف حيثما ذهب ( رؤ 14 : 4 ) "
    avatar
    tonyplk


    رقم العضوية : 106
    البلد - المدينة : المملكة العربية السعودية
    عدد الرسائل : 18
    شفيعك : الملاك ميخائيل
    تاريخ التسجيل : 07/11/2007

    cc رد: الحل لخطية العادة السرية

    مُساهمة من طرف tonyplk الأربعاء 7 نوفمبر 2007 - 20:53

    شكرا للمجهود الرائع
    تحياتي ياباشمهندس
    emy
    emy
    ملاك مشرف
    ملاك مشرف


    رقم العضوية : 4
    البلد - المدينة : egypt
    عدد الرسائل : 2189
    شفيعك : الملاك ميخائيل
    تاريخ التسجيل : 03/07/2007

    cc رد: الحل لخطية العادة السرية

    مُساهمة من طرف emy الخميس 8 نوفمبر 2007 - 10:56

    شكراً أخى العزيز على مرورك
    وربنا يبارك مشاركاتك
    أمين
    akristus
    akristus
    ملاك نشيط
    ملاك نشيط


    رقم العضوية : 328
    البلد - المدينة : مصر
    عدد الرسائل : 191
    شفيعك : الملاك ميخائيل
    تاريخ التسجيل : 10/04/2008

    cc رد: الحل لخطية العادة السرية

    مُساهمة من طرف akristus الثلاثاء 15 أبريل 2008 - 15:21

    ميرسى كتير اووووى على الموضوع جميلة
    كرستين
    كرستين
    ملاك محب
    ملاك محب


    رقم العضوية : 56
    البلد - المدينة : المنيا
    عدد الرسائل : 424
    شفيعك : الملاك ميخائيل
    تاريخ التسجيل : 05/08/2007

    cc رد: الحل لخطية العادة السرية

    مُساهمة من طرف كرستين الأربعاء 16 أبريل 2008 - 20:47

    شكرا جدا لتعب حضرتك بجد موضوع جامد والرد او الحل هايل جدا

    ربنا يبارك حضرتك

    انا عايزة اقول انة اجمل ما فى الكلام اللى حضرتك كاتبة هو البساطة
    وامين ربنا يوصل لكل مستعبد لاى خطية
    فهو الذى يستطيع كل شئ ولا يعسر علية امر

      الوقت/التاريخ الآن هو السبت 20 يوليو 2024 - 21:39