الرئيسية
أحدث الصور
الان يمكنك دخول المنتدى عبر حسابك على الفيس بوك
من طرف إحنا شعب وإنتوا شعب **واللي هز القلب منا**عمره ماهزلكوا قلب**رغم إن الرب واحد**لينا رب...وليكوا رب
+ وردة برية و براءة **إحنا بنشوف الطفولة ** و إنتوا شايفينها سبايا ** تثبتوا بيها الفحولة
+ إحنا يسعدنا خيالها ** لما ترسم ف الكتاب ** و إنتوا لو عدي خيالها ** يطلعلكوا ف ثانية ناب
+ إنتوا بتحبوا الجهامة ** و إحنا بنحب إبتسامة ** إحنا حرية و كرامة ** وإ نتوا سجن وشرع غاب ** إحنا شعب و إنتوا شعب
+ مصر بالنسبالنا ثومة ** والا ناصر .. أو حليم ** مصر بالنسبالكو خيمة ** أو إمارة أو حريم
+ إحنا نفديها بحياتنا ** و نحبها ونرضي بقليلها ** و إنتوا عايزين تنهبوها ** و تسرقوا خيرها ونيلها
+ إحنا يسقط منا شهدا ** زينة الدنيا وشبابها ** و إنتوا قلتوا كنتوا سعدا ** لما داسوا فوق ترابها
+ إحنا أقرب و إنتوا بعدا ** إحنا منها و إنتوا مردة ** إنتوا غل و نار و قاعدة ** أو عدو واقف ببابها ** إحنا شعب و إنتوا شعب
+ إحنا بنشوف ربنا ** رحمة للعبد اللي تاه ** عفو عن مخطئ مسئ ** توبة أو طوق للنجاة
+ و إنتوا تعبان القبور ** و المقارع للحريم ** سد باب الرحمة غية ** و اللي يغلط ف الجحيم ** و اللي يضحك يبقي كافر
و العبوس أخره النعيم
+ إحنا بنحب الحياة ** و إنتوا أعداء الحياة ** إحنا شعب و إنتوا شعب
+ إحنا بنشوف الحقيقة ** و العقيدة ف أي دين ** كنت قبطي أو يهودي ** والا ضمن المسلمين
+ رب واحد...معني واحد ** الرسالة يا مؤمنين ** ماتكدبوش ماتغيروش ** ف النوايا و الوشوش
+ حب جارك زي أهلك ** إحفظه ولا تخونوش ** و إنتوا تيجوا تخونوه
+ يختلف ف الرأي عنكوا ** تحلوا دمه وتقتلوه ** و تقولوا دينا قالنا ** أي دين يا أدعيا ** والا نبي م الانبيا
يأمر بكافر تصلبوه ** والا بوذي تبهدلوه ** والا شيعي تكفروه
واللي بيفكر دا ضال ** و تحرموا حتي الحلال ** و تحللوا فكر الضلال ** و تحكمونا يا أغبيا ** إحنا شعب وإنتوا شعب
+ إحنا شايفين الرسول ** رحمة مهداة للبشر ** سعي من أجل الوصول ** للكمال المنتظر
إحنا شايفين إن دينا ** دعوة للنور والحضارة ** و إنتوا حاصرينه ف حكاية ** توب قصير أو ستارة
إحنا شايفين إبن سينا ** وإبن رشد و الحسين ** وإنتوا شايفين بن لادن ** والكهوف المظلمين
إحنا عشاق الإرادة ** و الحقيقة و اليقين ** و إنتوا تجار المنابر ** و البخور و المجذوبين ** الخادعين للخاضعين
و الأكلين الشاربين ** النازلين الصاعدين ** للمصالح و المناصب ** وأما أمريكا بتأمر ** تصرخوا بقولة أمين
إحنا شعب وإنتوا شعب
إحنا مصري بسيط وراضي ** عسكري جاي م النجوع ** يسمع الراديو الصغير ** الأدان يملاه خشوع
يدعي ف الليل للي خلقه ** يحمي عيلته يزيد ف رزقه ** ف الدعا تنزل دموع ** عند رب العالمين
صادقة من غير فلسفة ** لا صوت جهوري ف ميكرفون ** يصرخ يهدد بالوعيد ** و كأنه واخد م السما
توكيل يكفر بعضنا ** يهدينا نرجع مسلمين ** يا عم مااحنا مسلمين ** و مؤمنين و موحدين
من قبل حتي ما تتولد ** و إحنا اللي وحدنا الإله ** قبل الديانة ما تتوجد
ولإن مصر المؤمنة ** قبل التاريخ في دمنا ** عمرنا ما حنبقي زيك ** ولا أنت حتكون زينا
لم غنمك أو جمالك ** أو مباخرك أو عيالك ** و المشانق من حبالك ** و العشيرة و الخيام
خد زعيقك خد صريخك ** خد فتاويك و اللجام ** خد حرام حرام حرام ** حلال عليك يا مسيلمة
اللي سرقته مننا ** و إبعد بعيد عن أرضنا ** لأنكوا...ولإننا ** إحنا شعب .. وإنتوا شعب
د. مدحت العدل 1/4/2013
