افكار لتدريب الكلاب المنزلية المشاغبة

اقتناء الكلب في المنزل مشكله اى شخص

تربية الكلب في منزل تختلف كلية عن تربية الكلب في حديقه او فوق سطح او أي مكان تاني، لأن المنزل ليه قوانين وقواعد كتير جدا لازم الكلب يتقنها، ومنها على سبيل المثال لا الحصر قضاء الحاجة في الحمام، عدم تخريب الاشياء الثمينة، عدم تمزيق الفراش أو الأوراق، عدم النباح بكثره وبصوت مزعج، وغيرها كتير. وأكبر مشاكل بتواجه المربين في المنازل مجموعة من النقاط هتكلم فيهم واحده واحده، وكل نقطه هتكلم عن حلها.

1- عض الأثاث و الفراش وزوايا الأبوب:
العض غريزة عند أي كلب، وطبعا منقدرش نحرمه من العض، لان العض مهم جدا لتقوية عضلات الفك، وكمان العض بيزيل التوتر النفسي عند الكلب وبيساعد على بناء شخصية قوية للكلب لانه بيشعره بمصدر قوته. لكن العض في المنزل غير مرغوب فيه، وكتير جدا بنلاقي ان الكلب مبهدل الأثاث وخاصة الأثاث الخشبي من العض وخصوصا في فترات التسنين.
ولحل مشكلة العض لازم نبتدي مع الجرو من صغره، والموضوع بيتلخص في اننا نقوم السلوك و نوفر له البديل.
تقويم السلوك: بيكون بأننا اول ما نلاقي الجرو بيبدأ يعض في حاجة زي زوايا الأبواب او الفراش نديله أمر Stop بصوت حاد وحازم ونراعي ان تعبيرات الوجه تكون صارمه علشان يعرف ان ده غلط. ولو الجرو استمر على مكان معين غالبا بنلجأ اننا ندهن المكان ده بالفلفل الاسود أو الخردل (المسترده) لان ريحتهم و طعمهم منفر جدا للكلب وبالتالي حيفهم ان المكان ده غلط يعض فيه أو يسن اسنانه فيه.
توفير البديل: يكون بأننا نجيب عضاضه للكلب، ودي بتتباع جاهزة في محلات الحيوانات وهي عباره عن قطعة مطاطيه سميكه مخصصة للكلب للعض فيها، وكمان نجيب عظام الكالسيوم المجففه، وبعد ما ندي الكلب أمر Stop على طول نديله البديل ولما يبتدي يعض فيه نشجعه بكلمة تشجيع زي bravo مثلا. بكده نضمن تقويم سلوك العض عند الكلب.

2- النباح المستمر:
النباح المستمر مشكلة كبيره بتواجه مربين كتير، ونباح الكلب له العديد من المعاني، ممكن يكون من الفرح أو لمجرد جذب الانتباه لأمر غريب وحاجات تانيه كتير. ولتدريب الكلب على عدم النباح أول ما الكلب يبتدي ينبح نديله أمر السكوت زي Silence مثلا ونطبطب عليه، واول ما يسكت نشجعه بأمر برافو ونحاول نشغله بأي حاجة تانيه زي العابه مثلا، وفي نقطه مهمه لازم الانتباه ليها، مينفعش ندي الكلاب مكافئه مادية عند الاستجابه للأمر، لانه بكده هيتعود ينبح علشان ياخد المكافئه، يعني احنا كده عملنا العكس، فالمفروض ننتبه أوي للنقطه دي. وعامة تدريب الكلب على عدم النباح المستمر بياخد وقت و مجهود لأن النباح غريزة اساسيه في الكلب و النباح محبب ليه جدا، بس بالصبر الكلب هيستجيب.

3- محاولة الهجوم على الغريب:
طبعا أي كلب عنده حس أمني هيحاول يهجم على أي شخص غريب يدخل البيت، ودي مشكلة، وناس كتير بتقع في مشاكل بسببها لانه ياما بيخلي الكلب اجتماعي وبيتعامل مع الكل، يعني بيفقده الحس الأمني، او من التدريب الخطأ بيحصل العكس والكلب بيكون عدواني جدا. ولتدريب الكلب على التعامل مع الغرباء لازم نراعي اننا منقتلش جواه الحس الأمني، وفي نفس الوقت يفهم ان في أشخاص كتير مسموح ليهم دخول المنزل بشرط تواجد صاحب المنزل أو اي حد من أصاحب المنزل.
ولتدريب الكلب على كده بنبتدي معاه من سن 6 شهور وبعد ما يكون اتقن أمر الثبات، ونخلي شخص غريب يدخل من الباب، وقبل ما يدخل ندي الكلب أمر الثبات، طبعا اول ما الشخص يدخل الكلب هيقعد يهوهو ويتنطط، ساعتها نديله أمر السكوت (Silence) وأول ما يسكت نطبطب عليه، ونخلي الشخص يدخل ويتعامل مع أفراد المنزل، وبعدين لما الكلب يتقن موضوع الهدوء لازم نطور التدريب بحيث ان الشخص الغريب بعد ما يدخل والكلب يكون هادي يحاول يأذي أحد افراد المنزل، وبالطبع الكلب هيبتدي يهوهو و ينبح ويحاول يهاجمه، ساعتها نشجع الكلب و نكافئه ونخلي الشخص الغريب يطلع من البيت وهو بيمثل الخوف من الكلب. والمهم في التدريب ده اننا منطولش الفتره بين اول تدريب وتاني تدريب، يعني مجرد ما نتأكد ان الكلب بيسمح للغرباء بالدخول على طول نبدأ معاه التدريب التاني وهو الدفاع. بالطريقه دي الكلب حيفهم ان اي شخص غريب ممكن يدخل لكن لو فكر يأذي أي حد من افراد المنزل هيبتدي يتعامل معاه بعنف ويدافع عن المنزل.

4- الصلاة ومكان الصلاة:
من الأمور المهمة في التربيه في المنزل تدريب الكلب على عدم لمس اي حد بعد الوضوء واثناء الصلاه، وكمان عدم لمسه لسجاده الصلاه. والتدريب ده من اسهل التدريبات، وبيبدأ بعد ما الكلب يتقن تماما أمر Stay، بكل بساطه بنتجه للوضوء وبعد ما نخلص وضوء ندي الكلب أمر الثبات، وطبعا نمثل اننا بنصلي، واكيد الكلب هيحاول يقرب من الشخص المتوضي لان جسمه هيكون مبلل والكلب هيحاول يلحسه، ساعتها نديله امر الثبات ونكمل كأننا بنصلي، وكل ما الكلب يحاول يقرب أو يلمس سجادة الصلاه نديله أمر Stop وبعده أمر Stay وأول ما نخلص صلاة نشجع الكلب بكلمة برافو ونديله مكافئه. وبسرعه هنلاقي ان الكلب اتعود انه لما يشوفك بتصلي تلقائيا يستناك وميقربش منك أبدا، وممكن نطور التدريب اكتر بأنك قبل ما تدخل تتوضأ تقول للكلب "صلاه" وتنفذ التدريب، والكلب بعد فتره هيربط الكلمة بالحدث وأول ما يسمعك بتقول صلاه هتلاقيه مستنيك عند سجاده الصلاه ومش هيفكر يلمسك لغاية ما تخلص صلاه وتلم السجادة.

5- احترام آداب المائدة:
آداب المائده من الأمور المهمة جدا للكلب في المنزل، لأننا كلنا مش عايزين نعاني من كلب بيخطف الأكل من على المناضد أو بيمد فكه في الأطباق. والتدريب على آداب المائده بيبتدي بأننا نأكل الكلب وجبته قبل ما نبتدي الأكل بنص ساعه تقريبا، بحيث اننا نبدأ أكل أول ما هو يخلص، وبكده هتكون معدته ممتلئه ومش محتاج ياكل. وطبعا في البدايه هيحاول يقرب من الأكل، وكل ما يعمل كده نديله أمر Stop مع مراعاة اننا نسيب الأكل في مكانه ومنحاولش نبعده عن الكلب علشان مش نزود الفضول عنده والرغبه في الوصول ليه.

6- عدم الركض على الباب عند فتحه:
من المشاكل اللي بنواجهها مشكلة الباب. كلاب كتير جدا أول ما الباب يتفتح تلاقيه بيجري على الباب ويخرج منه، وطبعا ده سلوك غير مرغوب فيه، وحله بأننا ندي الكلب نزهة يومية، وندربه على عدم الخروج الا بالأمر، ودي بسيطه جدا، نبدأ اننا نربط الكلب بالليش، وبعدين نفتح الباب، طبعا الكلب هيحاول يخرج ويفضل يشد الليش، وهنا نفضل واقفين وندي الكلب أمر الثبات. لغاية ما يثبت تماما وبعدين نكافئه ونشجعه ونقفل الباب ونكرر التمرين كذا مره لغاية ما الكلب يتقنه، وبعد كده نطور التمرين بدون الليش لغاية ما نتأكد تماما ان الكلب مش ممكن يطلع من الباب.
الخطوة التالية هي اننا نزود الموضوع بحيث ان الكلب ميطلعش من الباب حتى لو ماخدش امر الثبات، وده بيتم باننا ناخد الكلب عند الباب عادي جدا ونفتح الباب بدون ما نديله امر الثبات، ساعتها ممكن الكلب يحاول يخرج، ولو حاول يخرج نديله امر Stop بس ونكرر التمرين لغاية ما نتأكد تماما ان الكلب مش ممكن يخرج من الباب.
بجانب التمرين ده لازم ندي الكلب التمرين المضاد وهو ان الكلب يخرج بالأمر. وده بيتم باننا كل يوم ناخد الكلب للنزهة، ونخصص كلمة معينة للخروج زي مثلا Go out ونبتدي ناخد الكلب للباب، ونفتح الباب ويكون الكلب مربوط بالليش، وبعدين نديله امر الثبات، ولما يقف تماما نقول له Go out وفي نفس الوقت نتحرك بره البيت ونبتدي النزهه. وبتكرار التمرين الكلب هيعرف ان الأمر ده معناه الخروج.

7- التعايش بسلام مع الحيوانات المختلفه في المنزل:
الكلب لازم يتعلم من الصغر التعايش بسلام مع اي حيوانات في المنزل، والموضوع ده مهم جدا وله شقين:
الشق الأول نفسي: وبيكون أننا نوازن بين حبنا لأي حيوان تاني وحبنا للكلب، يعني مش نفضل ندي اهتمام لحيوان تاني ادام الكلب علشام ميشعرش بالغيره ويحاول يأذيه.
الشق الثاني عملي: وبيكون اننا نعود الكلب على وجود الحيوان الآخر، ودي بتختلف من حيوان لآخر يعني تعامل الكلب مع القطط غير العصافير غير السلاحف وهكذا. باختصار الموضوع بيكون على حسب نوع الحيوان التاني وبيكون اننا نحاول نقرب الكلب منه ونقوم اي سلوك عدائي تجاه الحيوان التاني عن طريق أمر Stop والمكافئه المادية و التشجيع المعنوي.
وعامة تدريب الكلب على التعايش بسلام مع الحيوانات الأخرى موضوع كبير جدا ومحتاج موضوع منفصل وان شاء الله هبقى اعمله لاحقا.

8- تدريبات أخرى:
طبعا كل منزل وله قواعده الخاصه، وممكن أي مربي يدرب كلبه على قواعده هو الشخصيه، والتدريبات السلوكية عامه بتتمثل في أمر Stop والتشجيع و المكافئه، وفي الموضوع هنا ماقدرش احط كل القواعد لكن حطيت القواعد المشتركه في كل منزل. وفي أمور اتكلمت عنها سابقا زي قضاء الحاجة و التغذيه، ومواضيع تانيه لسه هتكلم عنها منفصله زي التعامل مع الأطفال.